ໂລກສະເຫຼີມສະຫຼອງວັນເສືອໂລກ

(ແຫຼ່ງຂໍ້ມູນຈາກ tigers.panda.org)

ວັນເສືອໂລກໄດ້ຖືກສະເຫຼີມສະຫຼອງໃນທຸກໆປີໃນວັນທີ 29 ກໍລະກົດ ເປັນວິທີໜຶ່ງທີ່ຈະສ້າງຄວາມຮັບຮູ້ກ່ຽວກັບເສືອໃຫຍ່ທີ່ງົດງາມແຕ່ໃກ້ຈະສູນພັນນີ້. ວັນດັ່ງກ່າວໄດ້ຖືກສ້າງຕັ້ງຂຶ້ນໃນປີ 2010, ເມື່ອ 13 ປະເທດທີ່ມີເສືອອາໄສຢູ່ໄດ້ມາຮ່ວມກັນເພື່ອສ້າງ Tx2 - ເປົ້າໝາຍທົ່ວໂລກເພື່ອເພີ່ມຈຳນວນເສືອປ່າເປັນສອງເທົ່າພາຍໃນປີ 2022.

ປີ 2016 ເປັນຈຸດກາງຂອງເປົ້າໝາຍທີ່ທະເຍີທະຍານນີ້ ແລະ ປີນີ້ແມ່ນໜຶ່ງໃນວັນເສືອໂລກທີ່ມີຄວາມສາມັກຄີ ແລະ ໜ້າຕື່ນເຕັ້ນທີ່ສຸດເທົ່າທີ່ເຄີຍມີມາ. ສຳນັກງານ, ອົງການຈັດຕັ້ງຕ່າງໆ, ບັນດາບຸກຄົນທີ່ມີຊື່ສຽງ, ເຈົ້າໜ້າທີ່ລັດຖະບານ, ຄອບຄົວ, ໝູ່ເພື່ອນ ແລະ ບຸກຄົນຕ່າງໆທົ່ວໂລກໄດ້ມາຮ່ວມກັນສະໜັບສະໜູນການໂຄສະນາ #ThumbsUpForTigers - ເຊິ່ງສະແດງໃຫ້ບັນດາປະເທດທີ່ມີເສືອອາໄສຢູ່ເຫັນວ່າມີການສະໜັບສະໜູນຈາກທົ່ວໂລກຕໍ່ຄວາມພະຍາຍາມອະນຸລັກເສືອ ແລະ ເປົ້າໝາຍ Tx2.

ລອງເບິ່ງບາງຈຸດເດັ່ນຂອງວັນເສືອໂລກຕາມບັນດາປະເທດຂ້າງລຸ່ມນີ້.

“ການເພີ່ມຈຳນວນເສືອສອງເທົ່າແມ່ນກ່ຽວກັບເສືອ, ກ່ຽວກັບທຳມະຊາດທັງໝົດ - ແລະມັນຍັງກ່ຽວກັບພວກເຮົາອີກດ້ວຍ” – ມາໂຄ ແລມເບີດີນີ, ຜູ້ອຳນວຍການໃຫຍ່ WWF

ຈີນ

ມີຫຼັກຖານຂອງເສືອກັບຄືນມາ ແລະ ປັບປຸງພັນຢູ່ພາກຕາເວັນອອກສຽງເໜືອຂອງຈີນ. ປະຈຸບັນ, ປະເທດຈີນກຳລັງດຳເນີນການສຳຫຼວດເສືອເພື່ອປະເມີນຈຳນວນ. ໃນວັນເສືອໂລກນີ້, WWF-ຈີນ ໄດ້ຮ່ວມມືກັບ WWF-ຣັດເຊຍ ເພື່ອເປັນເຈົ້າພາບຈັດງານບຸນສອງມື້ໃນປະເທດຈີນ. ງານບຸນດັ່ງກ່າວໄດ້ເປັນເຈົ້າພາບຕ້ອນຮັບເຈົ້າໜ້າທີ່ລັດຖະບານ, ຜູ້ຊ່ຽວຊານດ້ານເສືອ ແລະ ຄະນະຜູ້ແທນຂອງບໍລິສັດຕ່າງໆ ພ້ອມທັງມີການນຳສະເໜີຈາກເຈົ້າໜ້າທີ່, ຕົວແທນຈາກເຂດສະຫງວນທຳມະຊາດ ແລະ ຫ້ອງການ WWF. ການສົນທະນາກຸ່ມນ້ອຍລະຫວ່າງບໍລິສັດ ແລະ ເຂດສະຫງວນທຳມະຊາດກ່ຽວກັບການອະນຸລັກເສືອໄດ້ຖືກຈັດຂຶ້ນ, ແລະ ໄດ້ມີການຈັດທັດສະນະສຶກສາສຳລັບຄະນະຜູ້ແທນຂອງບໍລິສັດຕ່າງໆ.